«Жаманға жан жуымас» дейді қазақ халқы. Қазақтар арасында басқа ұлттардың өз жеріндей өмір сүруі қазақ халқының жақсылыққа бейім тұруынан болса керек. Қазақ: «Өзі жақсы кісіге бір кісілік орын бар» дейді. Рас айтады. Біздің Иван атамыз айтқан сөзінен айнымайтын, турашыл, әділ адам болатын. Ол мүмкіндік болса, жәрдемін аямайтын. Атамыз өзі осы қасиетімен қазақтарға қатты ұнайды. Иван атамыз көп ұзамай диірменші болады. Түлкібастың түкпір-түкпірінде тұратын адамдар есекпен, атпен, өгізбен қапшық-қапшық бидайларын әкеліп жатады. Бірі кетсе, екіншісі келеді. Қысы-жазы тыным таппайды. Атам диірменінде күндіз-түні жұмыс істейді.
- Тамыр, саған рақмет. Балаларыңның қызығын көр, - дейді кетерде түлкі тымақты қазақтар.
«Жақсы – көпке ортақ» деген рас екен .