Қара теңіз жағалауының топырағына табанымыз тиген сәттен бастап Олимпиада қожайындарының қауіпсіздік шараларына өте қатты көңіл бөліп жатқанының куәсі болдық. Лаңкестік әрекеттердің дүмпуінен жақсы хабардар жұрт бұл шараларды түсіністікпен қабыл алды. Артық ауыз сөз жоқ, тексеруші тиісті орын қызметкерлерінің айтқанын екі еткізбейді.

Қала көшелерін аралап келе жатып өзі де сұлу Сочидің ұзатылар қыздай сыланып, тым ажарланып кеткен келбетін байқадық. Құдды бір Еуропаның озық елдерінің бірінде жүргендей әсерде болғанымыз рас. Биік талғаммен салынған сәулетті ғимараттар, жасыл желекке малынған, мұнтаздай таза көшелер, сол көшелердің сәнін келтірген небір тропикалық ағаш-талдар көз сүйсінтіп, көңіл семіртеді.