1923 жылдың 25 маусымында Семей қаласында дүниеге келген Жамал Мұсағалиқызы Қаңлыбаева – өжет қыздардың бірі. Өйткені, оның қызмет істеген саласы – тау-кен өндірісін зерттеу болатын. Жасынан зерек қыз бұл салада көп іс тындырды. Алғашқыда мектеп бітіріп, білім іздеп, сол кездегі қазақ елінің астанасы Алматыға келеді. "Білімі мықты мыңды, білегі мықты бірді жығады" дегендей, армандаған оқуы Қазақтың тау-кен институтына оқуға түсті. 1946 жылы оқу орнын тәмамдап, осы саладағы ғылыми жұмыстармен айналысты. 1954 жылдан бастап ол Ұлттық Ғылым академиясының зертханасын меңгере жүріп, тынымсыз еңбектенді. Ол 1964 жылы жер қабаттарындағы шахта қазбаларының әсерінен пайда болатын жылжу үдерістерін зерттеуге изотоптар қолданудың жаңа әдісін ұсынды. Алпыстан астам ғылыми еңбегін жариялап, үш монография жазды.
Ол Польшада 1963 жылы, АҚШ-та 1964 жылы, 1968 жылы Англияда, Францияда, ГДР-да, 1971 жылы Венгрияда өткен ірі халықаралық симпозиумдар мен конференцияларға қатысып, сөз сөйлеп, баяндама жасап, қазақ елінің жер асты байлығының қырсыры, өндірісі туралы ойларын ортаға салды.