Көзі қарақты қауым құқықтық негіздегі елде адамдар, ал халықаралық саяси аренада мемлекеттер сортқа бөлінбейді деп біздің талқы сауалына қарсы уәж айтар. Алайда, кешіріңіз, бұл өз-өзімізді алдау болады. Әйтпесе үйден аяқ аттап шыға салысымен біздер бөлініске түсе бастаймыз. Мәселен, банкті мысалға алалық. Ол тапқан табысына қарай тұтынушыларын бөліп қарастырып, әрқайсысына әрқалай қызмет көрсетеді, ал орнықты тіркеуі жоқ, «қара тізімдегілерді» мүлде адам құрлы көрмейді. Тіркей берсеңіз осы секілді қоғамда факт көп. Демек, әлсіздерді азулылар бүре салатын табиғи фактор бәріне ортақ заңды да, конституцияны да місе тұтпайды. Ондай көріністер халықаралық саяси аренада да жиі орын алады. «Үшінші мемлекеттер» деген терминге ие экономикалық-саяси ахуалы осал елдер, көбіне күшті деген қос тараптың әскери, экономикалық қақтығыс алаңына айналып шыға келетінін бүгінгі оқиғалар-ақ көрсетіп беріп отыр. «Алаш айнасы» осы мәселені салмақтап көрген еді.